Ilmga ilhom baxsh etuvchi manzillar

Talaba bo‘lish — bu faqat diplom emas, balki butun hayotingizdagi eng esda qolarli davrlardan biridir. Endi tasavvur qiling: siz darsga qadimiy zamonlardan qolgan binodan kirasiz, derazangiz orqasida tog‘lar, dengiz yoki go‘zal tabiat manzarasi bor, oraliqda esa tarix va ilm bir-biriga singib ketgan.

Ha, dunyoda shunday universitetlar borki, ular nafaqat o‘zining kuchli ta’limi, balki go‘zal kampuslari bilan ham mashhur. Bu blogda siz bilan dunyoning eng mashhur va eng chiroyli 5 universitetini ko‘rib chiqamiz — bu maskanlar sizni nafaqat o‘qishga, balki yashashga ham ilhomlantiradi.

Agar siz Harry Potter filmlarining ashaddiy muxlisi bo‘lsangiz, bir kun kelib Shotlandiyadagi Glasgow universitetiga tashrif buyurishingizni tavsiya qilamiz. 1451-yilda asos solingan bu dargoh 600 yillik tarixga ega bo‘lib, hatto 1933-yilda Albert Eynshteyn bu yerda nisbiylik nazariyasi haqida nutq so‘zlagan.

Tarix va san’at uyg‘unligini his qilmoqchimisiz? Unda Italiyadagi Bolonya universiteti siz uchun! 1088-yilda tashkil etilgan bu oliygohda “universitet” atamasi ilk bor qo‘llanilgan. Bu yerda Galileo Galilei ilmiy tadqiqotlar olib borgan.

Futbol, san’at va adabiyot yurti — Ispaniyaning eng qadimiy oliygohlaridan biri Salamanca universiteti 1218-yilda asos solingan. “Don Kixot” muallifi Miguel de Cervantes ham bu yerda tahsil olgan.

Rasmiy tashkil topgan sanasi yo‘q bo‘lsa-da, Oxford universiteti dunyoning eng mashhur ta’lim markazlaridan biri. 28 nafar Britaniya bosh vaziri shu yerda tahsil olgan, va u bugungi kunda ham global miqyosda yetakchi oliygoh sanaladi.

London deyilganida ko‘z oldimizga Big Ben va Westminster saroyi keladi. Ammo shu hududda joylashgan University of Westminster 1838-yildan buyon ijod, media va dizayn yo‘nalishlarida kuchli ta’lim beradi. 160 dan ortiq mamlakatdan talabalar bu yerda tahsil oladi.

Agar siz ham o‘z ta’lim yo‘lingizni nafaqat bilim, balki ilhom, go‘zallik va tarix bilan boyitmoqchi bo‘lsangiz — bu universitetlar siz uchun mukammal bosqich bo‘lishi mumkin. Chunki ba’zida joyning o‘zi ham insonning qanot ochishiga sabab bo‘ladi.